Iha Ambitu Komemorasaun Loron Konsulta Popular ba Dala 25

Suku Ossoala ho orgulho realiza Seremónia Abertura Jogu Komunitáriu COPA OSSOALA 2024 hanesan parte husi komemorasaun Loron Konsulta Popular ba Dala 25, momentu importante ida atu hanoin fila-fali luta, unidade no istória povu Timor-Leste nian.

Seremónia abertura ne’e hala’o ho partisipasaun husi lideransa suku, Konsellu Suku, juventude, atleta sira, reprezentante komunidade no ema barak husi aldeia sira iha Suku Ossoala. Atividade ne’e sai oportunidade ida atu hamutuk iha ambiente ida ne’ebé promove amizade, respeitu no espírito desportivu.

Iha liafuan abertura, lideransa suku husu ba atleta no komunidade atu uza kompetisaun ida-ne’e la’ós deit atu buka manán, maibé atu hametin relasaun entre juventude, promove disciplina no haburas valor solidariedade iha komunidade.

COPA OSSOALA 2024 organiza ho objetivu atu fó espasu ba juventude no komunidade atu partisipa iha atividade saudavel, promove talentu lokal no hametin unidade entre aldeia sira. Atividade desportiva mos espera bele kontribui ba dezenvolvimentu sosial no envolvimentu komunidade iha atividade pozitiva.

Iha selebrasaun ida-ne’e, komunidade mos aproveita oportunidade atu lembra fila-fali valor dame, liberdade no responsabilidade ne’ebé sai rezultadu husi Konsulta Popular, hodi kontinua hamutuk harii komunidade ida ne’ebé forte no dezenvolvida.

Governu Suku Ossoala hato’o agradese ba parte hotu ne’ebé fó apoiu no kontribui ba realizasaun atividade ida-ne’e no espera katak kompetisaun sei lao ho di’ak, hakmatek no espírito unidade.

“Hamutuk iha desportu, hamutuk harii komunidade.”