Ministra Solidariedade Sosiál no Inkluzaun (MSSI), Verónica das Dores, realiza atividade distribuisaun fos no pakote ai-han komplementár ba benefisiáriu hamutuk uma-kain 118 iha Suku Ossoala, Postu Administrativu Vemasse, Munisípiu Baucau, iha Sábadu, 12 Jullu 2025.

Atividade distribuisaun ne’e hala’o iha Sede Suku Ossoala ho objetivu atu fó apoiu direta ba grupu vulnerável sira iha komunidade, hodi ajuda reduz impaktu nesesidade moris lorloron no hametin seguransa ai-han ba família sira ne’ebé presiza.

Benefisiáriu sira ne’ebé simu apoiu iha programa ida-ne’e kompostu husi família vulnerável sira, idozus abandonadu, eróis vivus, ema ho difisiénsia, inan isin-rua no inan fó susu. Programa ne’e reflete kompromisu Governu liu husi MSSI atu kontinua garante inkluzaun sosial no fó atensaun ba grupu sira ne’ebé presiza liu tan.

Iha nia intervensaun durante atividade, Ministra Verónica das Dores hato’o katak apoiu ai-han hirak ne’e oferese ho domin no responsabilidade sosial atu ajuda komunidade iha nesesidade sira ne’ebé enfrenta iha tempu balun.

“Apoiu ai-han hirak ne’e oferese ho domin, hodi augenta netik nesesidade uma laran iha loron balun nia laran,” hateten Ministra.

Ministra mos enfatiza katak Governu kontinua servisu atu programa sosial sira bele to’o ba komunidade hotu, inklui área remota sira, hodi asegura katak ema hotu iha oportunidade atu simu apoiu tuir nesesidade.

Iha oportunidade ne’e, Xefe Suku Ossoala, Francisco Gama da Costa Lobo, hato’o agradese boot ba Ministra no ekipa MSSI tanba ho domin no kompromisu bele vizita diretamente komunidade Suku Ossoala, maske distánsia dook no kondisaun estrada ne’ebé seidauk di’ak.

Nia mos hato’o katak prezensa Governu iha komunidade sai sinal ida katak atensaun no apoiu ba komunidade kontinua sai prioridade, liu-liu ba família sira ne’ebé presiza apoiu sosial.

Komunidade ne’ebé partisipa iha atividade ne’e hato’o mos nia agradese tanba apoiu distribuisaun ai-han bele ajuda família sira atu sustenta nesesidade lorloron no hametin moris komunidade.

Atividade ida-ne’e remata ho entrega simbólika ba benefisiáriu sira no atmosfera solidariedade entre Governu no komunidade.

Mídia MSSI